Mae’r darn yn seiliedig ar y llyfr straeon A Noteworthy Tale a ysgrifennwyd gan Brenda Mutchnick a Ron Casden, gyda darluniau hynod gan Ian Penney. Ar y dechrau, mae pob nodyn yn byw mewn lle o’r enw Gwlad Rhapsodi. Mae pob nodyn yn gymeriad a byddwch yn clywed graddfa i ddarlunio’r cymeriadau sy’n byw yn Rhapsodi, sef Do, Re, Mi, Ffa, So, La, Ti. Yn ein fersiwn ni o’r stori, mae’r nodau hyn yn cael eu cipio gan Sain-gipiwr drwg sy’n gwahardd cerddoriaeth gan ddal y nodau’n wystlon.
 
Wedi’u caethiwo gan raff, mae’r nodau’n dawnsio i geisio torri’n rhydd, gan adlewyrchu symudiadau ei gilydd. Mae hyn yn cludo’r nodau a’r Sain-gipiwr i fyd breuddwydion sy’n eu hanfon i drwmgwsg. Wrth ddeffro, maen nhw’n ôl yn Rhapsodi ac yn dathlu gyda’i gilydd mewn gŵyl fawr.