Dw i wedi cael andros o hwyl wrth ddod i nabod Academi South 2 Hijinx a’r gobaith yw y bydd y darn rydyn ni wedi’i greu gyda’n gilydd yn adlewyrchu’r hwyl rydyn ni wedi’i chael. Drwy’r adeg dw i wedi cydweithio â Francis Maxey o NoFit State Circus ac ar y cyd rydyn ni wedi gadael lle i bersonoliaethau unigol y perfformwyr dywynnu drwy’r broses greadigol.

 

Dw i wedi dysgu cryn dipyn yn ystod y broses yma. Dw i hefyd wedi bod yn ceisio dysgu i’r myfyrwyr sut i wrando –i mi, sgil pwysicaf y cerddor – ac ymateb. Rydyn ni i gyd wedi dysgu llawer o sgiliau syrcas newydd y bydd llawer ohonynt i’w gweld yn ein darn Chaos, Peril & The Great Escape.

 

Ar y dechrau, cynigiodd Francis y thema ‘carchariad’ ac fel grŵp buon ni’n trafod y posibiliadau. Beth oedd yn peri i ni deimlo’n gaeth? A ydyn ni’n gaeth yn ein cyrff? Yn gaeth yn ein meddyliau? Yn gaeth yn y system?

 

Gobeithiwn fod ein darn yn trafod y posibiliadau hyn mewn ffordd chwareus a difyr.