Rydym yn ddiolchgar am y parhad yn y gefnogaeth a gyhoeddwyd gan Gyngor Celfyddydau Cymru heddiw wrth i ni barhau i fod yn un o sefydliadau ei Bortffolio. Mae’r cynnydd yn y gefnogaeth yn cydnabod y datblygiadau rydyn ni wedi’u gwneud dros yr ychydig flynyddoedd diwethaf i ehangu cyfleoedd i gerddorion Cymru. Byddwn yn awr yn mynd ati i bwyso a mesur y newyddion hwn; i adfyfyrio ar ei effaith, a sut y gallwn atgyfnerthu ac adeiladu o hyn ymlaen. Byddwn yn rhannu gwybodaeth bellach yn fuan.

Gwyddom yn rhy dda ei bod yn gyfnod heriol iawn i’r diwydiant ac i Gyngor Celfyddydau Cymru fel ei gilydd. Mae ein meddyliau gyda phawb sydd wedi derbyn newyddion anodd heddiw. Gobeithiwn y gall y sector fod yn lle sy’n cefnogi ac yn gofalu am ei aelodau ac y gellir ysgogi’r creadigrwydd, y cydweithio a’r gwytnwch sy’n sail i’n gwaith i fynd ati i gael gafael ar gyfleoedd newydd ac ystyrlon i bobl ffynnu. Byddwn yn chwarae ein rhan yn hyn o beth.

Hoffem estyn croeso cynnes i aelodau newydd y portffolio a gyhoeddwyd heddiw. Rydym yn gweld cyfleoedd enfawr i gerddoriaeth Cymru ffynnu drwy bartneriaethau newydd posibl a thrawsbeillio, wrth i’r sector ehangu i fod yn fwy agored, cynhwysol ac amrywiol ei waith.

Rydym yn parhau i fod yn ymrwymedig i gefnogi artistiaid, cymunedau a chynulleidfaoedd i greu, perfformio ac ymwneud â cherddoriaeth Cymru. Os oes gennych unrhyw gwestiynau ynghylch newyddion heddiw, mae croeso cynnes i chi gysylltu â ni drwy enquiries@tycerdd.org