Yn y bôn, mae’r gwaith a gyflwynir yn ceisio mireinio syniad gonest – motiff gyda chymeriad o ran rhythm, harmoni a ffurf. Mae gwreiddiau’r syniad yn gysylltiedig â dilyniant sy’n gallu disgyn yn ddiddiwedd drwy gyweiriau. Bu hyn yn rhoi digon o le i mi ar y cychwyn ond bu datblygu patrwm o’r fath ymhellach yn golygu gwneud i’w gyfeiriad fod yn llai tryloyw. Byddai lleisiau monoffonig arbennig pob offeryn acwstig, i’m tyb i o leia, yn cydweithio’n gynhaliol wrth gael eu cydblethu’n bolyffoni byw yn enwedig wrth ystyried absenoldeb ychydig o’r bas. Er yn dipyn o her, mae cydweithio â math anghyffredin o ensemble hefyd wedi bod yn brofiad perthnasol at ffurfio grwpiau at ddibenion chwarae cerddoriaeth newydd. Ac ar ôl bod ar fy mhen fy hun braidd dros y ddwy flynedd diwethaf, cael ailgyfarfod yn gadarnhaol â cherddorion sydd â meddwl agored oedd fy mhrif amcan.