Caiff Cysgodion ei rhyddhau ar Sionci, sef label Tŷ Cerdd sydd dan arweiniad artistiaid, ac mae’r albwm newydd hwn yn cyflwyno saith gwaith newydd ar gyfer ffidil ac electroneg, wedi’u perfformio gan y feiolinydd o fri rhyngwladol Darragh Morgan.

​

Mae Cysgodion yn dwyn ynghyd gyfansoddiadau gan Angharad Davies, Sara Evelyn, Delyth Field, Joseph Graydon, Joshua Lascar, Richard McReynolds, a Natalie Roe. Mae’r albwm yn cyflwyno lleisiau newydd gwahanol o Gymru, gan archwilio croestoriadau arbrofion acwstig ac electronig.

​

Mae pob gwaith yn archwilio dull unigryw o integreiddio electroneg greadigol â gweadau mynegiannol ffidil byw – trwy waith byrfyfyr, prosesu byw, synthesis modiwlaidd, recordiadau maes, cyfryngau sefydlog, peiriant tâp, dylunio sain, a samplu. Cynhyrchodd pob cyfansoddwr ei drac ei hun hefyd, gyda rhai darnau hefyd yn ymgorffori perfformiad electronig gan yr artistiaid eu hunain, gan adlewyrchu egni ac ehangder y maes cyfansoddi electroacwstig newydd sy’n datblygu yng Nghymru.

​

Recordiwyd perfformiad ffidil Darragh Morgan yn Stiwdio Tŷ Cerdd yng Nghanolfan Mileniwm Cymru, Caerdydd. Datblygwyd y prosiect ehangach trwy raglen Ffidil Plws Tŷ Cerdd (sy’n rhan o CoDI, sef menter datblygu artistiaid ehangach y sefydliad), a thrwy’r prosiect hwnnw crëwyd chwe gwaith newydd trwy raglen ddwys o weithdai a mentora gan Darragh Morgan a’r feiolinydd arbrofol a byrfyfyr Angharad Davies.

​

Dywedodd Angharad Davies: “Mae cyfleoedd datblygu artistiaid fel Ffidil Plws yn creu sylfaen ar gyfer rhannu syniadau, technegau a phrofiad – nid yn unig o’r mentor i’r sawl sy’n cael ei fentora, ond hefyd rhwng pawb sydd y tu ôl i’r llenni yn y prosiect ym mhob ffordd – maent yn fannau hanfodol i feithrin ac adeiladu cymunedau.”

​

Yn ôl Darragh Morgan: “Ar ôl cydweithio â channoedd o gyfansoddwyr yn rhyngwladol a chomisiynu gwaith newydd ganddynt, a gan fod gennyf ddau albwm cerddoriaeth sy’n bwrpasol ‘ar gyfer ffidil ac electroneg’, rwyf wrth fy modd bod y platfform hwn i ddatblygu artistiaid yn bodoli i mi rannu fy arbenigedd, fy mhrofiadau a fy ymarfer, gan feithrin ac annog ymgysylltiad beirniadol a chadarn â phosibiliadau’r cyfrwng gyda chyfansoddwyr nad oeddent efallai wedi cael y cyfleoedd hyn o’r blaen. Mae fy ymarfer fy hun wedi’i wreiddio yn yr ymgais i ehangu ac esblygu ymhellach bosibiliadau sonig a chwmpas y ffidil, ac mae’r prosiect cydweithredol hwn gyda’r crewyr cerddoriaeth hyn wedi parhau yn yr un cywair, gan greu cerddoriaeth a chodi’r safon i anelu at waith o’r ansawdd uchaf.”

​

Caiff Cysgodion ei ryddhau ar Sionci Records – ac mae ar gael i’w ffrydio a’i lawrlwytho ar yr holl brif blatfformau