A minnau’n ansicr pa fath o gerddoriaeth roeddwn i ei eisiau ar gyfer y prosiect hwn, es ati yn gyntaf i arbrofi, gan ymchwilio i’r rhyngweithio cymhleth rhwng yr electroneg a’r nodiant. Ar ôl mynd ar drywydd hyn am sbel heb fawr ddim yn dod ohono, penderfynais fynd yn ôl ac edrych eto ar y darn hwn, yn symlach y tro hwn, a dechreuais gydag un llinell alaw sionc ar y piano, sydd i’w chlywed ar y dechrau. Cefais fy ysbrydoli gan yr alaw, ac o ganlyniad mae tonyddiaeth y darn yn amlwg yn y modd Doraidd. Hefyd, o feddwl eto, yn lle deuawd rhwng yr electroneg a’r nodiant, penderfynais fy mod eisiau i’r electroneg gynorthwyo’r deunydd, pwysleisio’r gerddoriaeth a berfformiwyd eisoes, yn hytrach nag ychwanegu mwy at y sain sydd eisoes yn lluoseiniol, a gwneir hyn trwy ategion electronig fel Decay, Reverb ac EQ.

Yn olaf, ar ôl gorffen ysgrifennu’r darn hwn, roeddwn i angen teitl a oedd yn driw i’r broses gyfan hon. Penderfynais alw’r darn yn New Leaf, gan fod yr arddull hon o gerddoriaeth fel chwa o awyr iach i mi ac fe’i hysgrifennwyd ar drothwy degawd newydd.