Atamanaa (sef Arabeg am “rwy’n gobeithio”) yw EP cyntaf Panedeni  ac mae’n dilyn y senglau Tafod ac Atamanaa ganddynt a’r rhain hefyd wedi’u rhyddhau ar Sionci yn gynharach eleni. Mae enw’r band, sef ‘Panedeni’, yn cyfuno’r gair Cymraeg ‘paned’ â the Adeni o Yemen, gan symboleiddio diwylliant cyffredin Arabaidd a Chymreig a dod â phobl ynghyd. 

​

Mae Atamanaa yn ehangu sain drawsddiwylliannol Panedeni, ac yn cynnwys cydweithrediadau gyda Siôn Rickard (Lo-fi Jones) ac Ayoub Boukhalfa (Côr Un Byd Cymru). Mae’r record hon yn cael ei chanu mewn pedair iaith – Cymraeg, Saesneg, Arabeg a Bosnieg – ac mae’n cyfuno repertoire traddodiadol â chyfansoddiadau gwreiddiol, gan archwilio elfennau rhythmig a melodig o draddodiadau’r Dwyrain Canol a Cheltaidd.

 

Meddai Yasmine Latkowski, cyfarwyddwr cerddorol Panedeni: “Mae Atamanaa yn gyfuniad o ddiwylliannau, rhai Cymreig ac Arabaidd yn bennaf, sy’n adlewyrchu fy nghartref a’m treftadaeth. Mae’r cydweithio ag artistiaid eraill, Siôn Rickard ac Ayoub Boukhalfa, yn gwireddu fy nyhead i ddod â cherddorion a chyfansoddwyr caneuon at ei gilydd. Rydym wedi recordio oud, gitâr, ffidil, clarinét, ffliwtiau, offerynnau taro Eifftaidd, bas a lleisiau mewn pedair iaith wahanol, ac mae hyn yn dangos ein brwdfrydedd dros uno pobl a dathlu’r hyn sy’n ein gwneud yn debyg ac yn wahanol.”