​Mewn da bryd ar gyfer y Nadolig, mae'r côr arobryn o Gaerdydd, Côr CF1, yn rhyddhau eu trydydd albwm Cerddwn Drwy'r Tywyllwch. 

​

Mae'r casgliad yma o ganeuon yn adlewyrchu siwrnai gerddorol Côr CF1 ers 2020, pan nad oedd cyd-ganu'n bosibl. Ers hynny, mae'r côr wedi mynd o nerth i nerth. Gyda phob darn, mae'r côr yn rhannu rhan o'u stori - stori sy'n cydblethu'r traddodiadol a'r modern, hiraeth a hapusrwydd, ac sy'n brawf o ble mae'r côr wedi dod.

Mae Eilir Owen Griffiths wedi bod yn Gyfarwyddwr Cerdd ar y côr ers ei sefydlu fel côr ieuenctid yn 2002. 

Gan siarad am yr albwm, dywedodd Eilir: "Mae hi'n bron i 15 mlynedd ers ein halbwm diwethaf, ac ro'n ni'n meddwl ei bod hi'n hen bryd recordio peth o'r repertoire newydd, a dangos sut da ni fel côr wedi tyfu. Mae'r darnau yma'n golygu lot i ni fel grŵp. Fe wnaethom ni gomisiynu rhai o'r darnau, ac felly maen nhw'n sbesial iawn i ni, a da ni wedi ennill cystadlaethau gyda rhai hefyd, sy'n golygu bod nhw'n agos iawn at ein calonnau." 

​

Mae Cerddwn Drwy’r Tywyllwch yn drac ar yr albwm, ac fe'i cyfansoddwyd gan Richard Vaughan, i eiriau Ifan Erwyn Pleming, yn ystod dyfnderoedd tywyll y pandemig yn 2020. Recordiwyd y gân yn wreiddiol yn 2020 fel côr rhithiol, gyda dros 200 o gantorion, yn cynrychioli 55 o gorau o bob cwr o Gymru, yn ogystal â Phatagonia, UDA, yr Almaen, a Lloegr. Cafodd y fideo ei ddangos am y tro cyntaf ar Heno (S4C) ar 22 Gorffennaf 2020. 

​

Ychwanegodd Eilir: "Wnaeth y geiriau rili nharo fi. Roedden nhw'n dangos siwrnai CF1 ers y cyfnod clo, sut daethom ni allan ohono'n gryfach fel unigolion, ac fel côr, da ni'n deulu. Mae'n ddarn arbennig iawn, ac mae'r ffaith ei fod wedi ei gyfansoddi gan aelod o'r côr, a'r geiriau gan gyn-aelod, yn ei wneud yn fwy arbennig byth." 

​

Mae'r côr wedi gweithio gyda Tŷ Cerdd | Music Centre Wales ar y recordiad, sy'n cael ei ryddhau gan label Sionci'r sefydliad.