Defnyddio’r Adolygiad Cerddoriaeth Draddodiadol i ffurfio eich prosiect

 

Does dim rhaid i chi ddarllen Adolygiad Cerddoriaeth Draddodiadol Cyngor Celfyddydau Cymru cyn ymgeisio, ond os ydych chi’n chwilio am ysbrydoliaeth, mae’n lle gwych i ddechrau arni.  

 

Comisiynwyd yr Adolygiad gan Gyngor Celfyddydau Cymru er mwyn deall beth sydd ei angen ar y sector cerddoriaeth draddodiadol yng Nghymru ar hyn o bryd. Mae’n cofnodi lleisiau dros 200 o gerddorion, addysgwyr, trefnwyr, a chynulleidfaoedd, gan gynnig darlun casgliadol ynghylch ble mae’r egni, y cyfleoedd a’r bylchau. 

 

Dengys yr adroddiad gryfder a breuder y sîn. Mae’n dangos bod cyfoeth o wybodaeth, creadigrwydd ac arfer da ledled Cymru ond sonia hefyd am yr angen i gael gwell cysylltiadau a chefnogaeth, a chryfhau pa mor weladwy ydyw. Gall prosiectau a ariennir gan y cynllun hwn helpu i ddiwallu rhai o’r anghenion hyn. 

​

Er bod yr Adolygiad wedi canfod bod datblygiad creadigol artistiaid yn ffactor pwysig, mae’n bwysig nodi bod prosiectau sy’n canolbwyntio’n unig ar yr elfen hon y tu allan i gwmpas y gronfa hon ar hyn o bryd. 

 

Efallai y gallech ddefnyddio’r Adolygiad ar gyfer y canlynol:  

• Nodi lle gallai eich gwaith lenwi bwlch neu gryfhau rhwydwaith. 

• Canfod cyfleoedd i gydweithio ag eraill neu adeiladu cysylltiadau rhwng cymunedau. 

• Dod o hyd i syniadau ar gyfer prosiectau sy’n ymateb i heriau gwirioneddol yn y sector. 

• Dangos sut mae eich syniad yn adeiladu ar leisiau eraill yn y gymuned cerddoriaeth draddodiadol. 

  

Syniadau am brosiectau sy’n gysylltiedig â chanfyddiadau’r Adolygiad    

Dyma rai ffyrdd y gallai artistiaid droi themâu allweddol yr Adolygiad yn syniadau prosiect cryf:  

 

1. Dysgu cymunedol a llawr gwlad 

​

Yr her: Canfu’r Adolygiad fod mynediad i gerddoriaeth draddodiadol yn aml yn dibynnu ar bwy rydych chi’n ei adnabod neu ble rydych chi’n byw. 

​

Syniadau am brosiectau:  

• Creu clwb alawon lleol neu grŵp dysgu anffurfiol sy’n agored i chwaraewyr newydd. 

• Datblygu adnoddau cymunedol dwyieithog fel casgliadau alawon, tiwtorialau fideo, neu ganllawiau ar gyfer dechrau sesiynau, a’u rhoi ar waith mewn cyfres o sesiynau. 

• Cefnogi cyfarfodydd cerddoriaeth dan arweiniad y gymuned sy’n dod â phobl ynghyd i ddysgu alawon a rhannu traddodiadau. 

• Cynnig gweithdai cyflwyno mewn neuaddau neu fannau diwylliannol lleol, gan ei gwneud hi’n hawdd i ddechreuwyr gymryd rhan. 

 

​

2. Cyfleoedd ar lawr gwlad i bobl ifanc

 

Yr her: Tynnodd yr adolygiad sylw at ddiffyg cyfleoedd ar lawr gwlad i blant a phobl ifanc. Os yw’r rhan fwyaf o weithgarwch cerddoriaeth draddodiadol wedi’i anelu at oedolion – megis digwyddiadau gyda’r nos neu sesiynau tafarn – sut gall pobl ifanc heb brofiad blaenorol ddod ar ei draws, rhoi cynnig arni, a chymryd rhan yn rheolaidd? 

​

Syniadau am brosiectau:  

• Dod â cherddoriaeth draddodiadol fyw i ysgolion drwy bartneru â lleoliad lleol neu artistiaid gwadd. 

• Defnyddio Cynllun Hyrwyddwyr Ifanc Noson Allan i gefnogi plant i drefnu eu gigs cymunedol eu hunain. 

• Cynnig sesiynau “rhowch dro ar chwarae offeryn” mewn partneriaeth â’ch gwasanaeth cerdd lleol. 

• Gweithio gydag ymarferydd creadigol i sefydlu gweithgaredd rheolaidd yn yr ysgol, fel grŵp cerddoriaeth draddodiadol ar ôl ysgol, band gwerin neu grŵp dawns. 

• Cysylltu â gŵyl leol i greu cyfle perfformio i’ch grŵp. 

• Gwneud yn siŵr bod pobl ifanc yn gwybod am gyfleoedd datblygu pellach, fel gwersylloedd ieuenctid ar gyfer cerddoriaeth draddodiadol ​ 

 

​

3. Rhannu gwybodaeth a mentora

 

Yr her: Mae llawer o wybodaeth draddodiadol ym meddiant unigolion ac mae angen cefnogaeth i’w throsglwyddo.

 

Syniadau am brosiectau:  

• Paru deiliaid profiadol traddodiad â cherddorion newydd neu drefnwyr cymunedol i rannu repertoire a dulliau addysgu. 

• Cynnal gweithdai sy’n pontio’r cenedlaethau lle mae chwaraewyr hŷn ac iau yn dysgu ochr yn ochr. 

• Dogfennu a rhannu dulliau addysgu neu repertoire i eraill eu defnyddio ar ôl y prosiect. 

  

​

4. Mynediad a bod yn weladwy 

 

Yr her: Mae’r cyhoedd yn dal yn ei chael hi’n anodd dod o hyd i gerddoriaeth draddodiadol – mae gwybodaeth wedi’i gwasgaru ac mae cyfleoedd yn aml wedi’u cuddio. 

 

Syniadau am brosiectau:  

• Datblygu canolbwynt lleol neu ar-lein sy’n cysylltu sesiynau cymunedol, clybiau alawon, adnoddau a threfnwyr a chynnal rhai sesiynau cydweithredol ar draws grwpiau. 

• Creu adnodd ar-lein sy’n rhannu alawon, straeon, neu gyfweliadau o’ch ardal. 

• Cynnal digwyddiad cymunedol agored neu ddiwrnod blasu lle gall pobl ddysgu alawon, clywed straeon, a chysylltu ag eraill sy’n ymwneud â’r traddodiad. 

  

​

5. Cynhwysiant a chynrychiolaeth 

 

Yr her: Mae rhai cymunedau a grwpiau diwylliannol yn teimlo eu bod wedi’u tangynrychioli yn y dirwedd gerddoriaeth draddodiadol.   

​

Syniadau am brosiectau:  

• Cydweithio â cherddorion o draddodiadau amrywiol i archwilio repertoire, traddodiadau a dulliau rhannu gyda chymunedau. 

• Gweithio gyda threfnwyr lleol i wneud sesiynau’n fwy hygyrch a chroesawgar – efallai trwy gyfieithu, cymorth teithio neu ddod o hyd i leoliadau priodol – a rhoi cynnig ar y model newydd. 

• Ymchwilio a dogfennu straeon, alawon neu draddodiadau lleol o leisiau heb gynrychiolaeth ddigonol, gan eu rhannu trwy weithdai neu sesiynau cymunedol. 

    

 

6. Cydweithredu ac adeiladu’r sector 

 

Yr her: Mae’r Adolygiad yn galw am gydweithio mwy cydgysylltiedig, arweinyddiaeth gryfach, a chyfathrebu ar draws y sector.  

 
Syniadau am brosiectau:  

• Dod â threfnwyr neu glybiau alawon rhanbarthol ynghyd i gyd-greu adnoddau neu gydgynllunio cyfarfodydd / dod ynghyd.  

• Cyd-ddatblygu hyfforddiant neu becynnau cymorth ar gyfer arweinwyr cymunedol gan ganolbwyntio ar ddulliau addysgu, hygyrchedd neu ddiogelu, a’u rhoi ar waith yn eich gwaith cyfranogol. 

• Treialu cyfnewid cymuned-i-gymuned lle mae dau grŵp yn ymweld â’i gilydd i rannu alawon, iaith a syniadau. 

​

​