Ganed Dilys Roberts ar 19 Awst 1918 yn Nolgellau, lle’i magwyd ar aelwyd gerddorol a’i haddysgu yn ysgol enwog Dr Williams i ferched. Dechreuodd gyfansoddi tra’n ifanc iawn ac fe ddyfarnwyd iddi Ysgoloriaeth Turle o Goleg Girton, Caergrawnt ac yn dilyn hynny Ysgoloriaeth Joseph Parry i Goleg Prifysgol De Cymru a Mynwy yng Nghaerdydd. 

Pan ddychwelodd yn fuddugoliaethus o Gaergrawnt fe’i cyfarchwyd yng ngorsaf Dolgellau (ei thad oedd meistr yr orsaf) gan y band pres a chorau cymysg lleol gyda’r baneri yn chwifio i’w llongyfarch ar ei champ. Ond er gwaethaf hyn i gyd dewisodd fynd i Gaerdydd ac fe ymhyfrydai o allu dilyn esiampl Morfydd Owen a Grace Williams gan astudio, fel hwythau, dan yr Athro David Evans yn Adran Gerdd y ddinas. Daeth dau gyfarfyddiad yno i newid cwrs ei bywyd: dod i adnabod ei darpar w^r David Elwyn-Edwards, myfyriwr diwinyddiaeth, a’r cyfle i ganu cerddoriaeth Herbert Howells yng nghôr siambr y Brifysgol. 

Wedi graddio ac yn nyddiau duon rhyfel, dychwelodd i ddysgu yn ei hen ysgol yn Nolgellau ond agorodd pennod newydd yn ei hanes yn 1947 pryd enillodd ysgoloriaeth agored arbennig i astudio cyfansoddi yn y Coleg Cerdd Brenhinol yn Llundain gyda neb llai na’i heilun Herbert Howells. Ac fe briododd David hefyd, gan gymryd yr enw cofiadwy Dilys Elwyn-Edwards a fu’n sêl ar ei gyrfa broffesiynol.