GALWAD: Cyfansoddwr Cyswllt 19.08.26

Cyfle cyfansoddi dechrau gyrfa

Mae elusen Ceerddorion Ifanc Dyfed yn gwahodd ceisiadau am rôl newydd fel Cyfansoddwr Cyswllt ar gyfer cynllun arloesol 'Cyfansoddwyr Ifanc Dyfed' sydd, mewn partneriaeth â Cherddorfa Genedlaethol Gymreig y BBC, yn cefnogi addysgu cyfansoddi mewn ysgolion uwchradd ledled Siroedd Caerfyrddin, Ceredigion a Phenfro.

Y rôl

Mae'r cyfle hwn yn rhedeg o fis Medi 2026 tan fis Ebrill 2027. Bydd y Cyfansoddwr Cyswllt yn cael ei gefnogi a'i fentora drwy gydol y flwyddyn gan Gyfansoddwr Preswyl Cyfansoddwyr Ifanc Dyfed, Lynne Plowman. Byddwch yn gweithio mewn ysgolion ochr yn ochr â Lynne Plowman, i gefnogi ac annog disgyblion cerddoriaeth TGAU a Safon Uwch i gyfansoddi darnau ar gyfer pedwarawd o gerddorion o Gerddorfa Genedlaethol Gymreig y BBC. Yr ensemble eleni yw ffliwt, bas dwbl, telyn ac offer taro. Bydd angen i chi fod ar gael i fynychu cyflwyniad ysgolion cychwynnol ar naill ai 22ain, 23ain neu 24ain o Fedi. Yna bydd gweithdai cyfansoddi yn digwydd mewn ysgolion ledled y rhanbarth rhwng Medi 28ain a Rhagfyr 18fed (hyd at 20 gweithdy hanner diwrnod - dyddiadau i'w cytuno).

Ym mis Ionawr 2027, gwahoddir y Cyfansoddwr Cyswllt i addysgu rhai sesiynau tiwtorial cyfansoddi un-i-un ar-lein – gyda chymorth y Cyfansoddwr Preswyl. Ym mis Mawrth 2027, bydd cerddorion o Gerddorfa Genedlaethol Gymreig y BBC yn cynnal gweithdai a recordio cyfansoddiadau gorffenedig y disgyblion yn Neuadd Hoddinott, Bae Caerdydd. Gwahoddir y Cyfansoddwr Cyswllt i fynychu ac o bosibl arwain rhai o'r sesiynau hyn, gyda chefnogaeth y Cyfansoddwr Preswyl. (Y dyddiadau yw Mawrth 12fed-18fed)

Cynhelir 'Cyngerdd Dathlu' terfynol ar Ebrill 11eg yn Rhosygilwen, Sir Benfro, a gwahoddir y Cyfansoddwr Cyswllt i fynychu.

Mae'r ymrwymiad amser ar gyfer y rôl yn hyblyg ac yn dibynnu ar argaeledd. Telir sesiynau gweithdy ar gyfradd ddyddiol o £295 y dydd ynghyd â threuliau teithio (a threuliau prydau bwyd a llety lle bo angen.)

Yr hyn yr ydym yn chwilio amdano

Bydd yr ymgeisydd llwyddiannus yn gyfansoddwr gweithredol ar ddechrau gyrfa ac nid mewn addysg amser llawn. Bydd angen i chi fod yn raddedig mewn cerddoriaeth gydag arbenigedd mewn cyfansoddi ac wedi'ch lleoli yn Ne neu Orllewin Cymru. Anogir siaradwyr Cymraeg i wneud cais. Bydd gennych sgiliau cyfathrebu rhagorol ac angerdd gwirioneddol dros rannu celfyddyd cyfansoddi gyda'r genhedlaeth nesaf. Byddai rhywfaint o brofiad addysgu yn ddefnyddiol ond nid yw'n hanfodol. Yn ddelfrydol, bydd gennych brofiad o gyfansoddi gyda DAWs a meddalwedd nodiant gan gynnwys Sibelius, MuseScore, Flat, a NoteFlight.

Oherwydd lleoliad yr ysgolion, bydd angen trwydded yrru a'ch cerbyd eich hun arnoch ar gyfer gweithdai'r hydref. Os cewch eich dewis ar gyfer y rôl, bydd angen i chi wneud cais am wiriad DBS Manwl. Sut i Ymgeisio Ysgrifennwch lythyr cyflwyniad byr, gan egluro pam mae'r cyfle hwn yn iawn i chi ac amlinellu unrhyw brofiad, sgiliau a rhinweddau perthnasol y byddech chi'n eu cynnig i'r rôl. Cynhwyswch eich CV a dolen i PDF o sgôr nodiant un o'ch cyfansoddiadau gyda recordiad byw (nid midi) yn gysylltiedig. Dylid anfon ceisiadau drwy e-bost at Emyr Wynne Jones (Cadeirydd Ymddiriedolwyr Cerddorion Ifanc Dyfed) ar llysynant@gmail.com .

Y dyddiad cau ar gyfer ceisiadau yw 5yp ar 19eg Awst 2026.

Y bwriad yw cynnal cyfweliadau ar gyfer y rhai fydd ar y rhestr fer ar Awst 26ain.