Tŷ Cerdd a FOCUS Wales yn creu Memorandwm Cyd-ddealltwriaeth i gryfhau'r bartneriaeth #CerddoriaethGymreigDramor

Y band o Wrecsam, Gallops, yn arddangos ar gyfer FOCUS Wales 

Heddiw mae FOCUS Wales a Tŷ Cerdd, sefydliadau blaenllaw o ran datblygu cerddoriaeth Cymru, wedi cyhoeddi eu Memorandwm Cyd-ddealltwriaeth newydd i hyrwyddo proffil rhyngwladol cerddoriaeth Gymreig o dan faner #CerddoriaethGymreigDramor. 

Mae'r cytundeb yn ffurfioli ymrwymiad a rennir i gydweithio'n strategol – tra'n cynnal eu cenhadaeth annibynnol – i ddatblygu, hyrwyddo a chefnogi cyfleoedd rhyngwladol i artistiaid o Gymru ar draws genres cerddorol. Mae'r Memorandwm Cyd-ddealltwriaeth yn bwrw ymlaen gyda ffordd o weithio mewn partneriaeth a ffurfiwyd yn 2023 (ynghyd â Trac Cymru), gyda'r nod o amlygu cyfleoedd i artistiaid o Gymru.  

Gweledigaeth a rennir ar gyfer twf byd-eang 

Trwy'r bartneriaeth hon, bydd y ddau sefydliad yn gweithio i: 

• Ehangu cyfleoedd arddangos rhyngwladol i artistiaid o Gymru 

• Cryfhau allforio i farchnadoedd presennol ac i farchnadoedd sy'n dod i'r amlwg 

• Cefnogi artistiaid sy'n gweithio o fewn llwybrau masnachol ac anfasnachol 

• Rhannu deallusrwydd marchnad, rhwydweithiau ac adnoddau i wneud y mwyaf o'r effaith 

• Hyrwyddo Cymru fel gwlad gerddoriaeth ddeinamig 

Dros y blynyddoedd diwethaf mae'r ddau sefydliad wedi dangos mwy o ffocws ar weithio’n rhyngwladol. Mae FOCUS Wales yn cefnogi artistiaid sy'n dod i’r amlwg ac sy’n barod i’w hallforio i arddangos mewn digwyddiadau rhyngwladol blaenllaw yn y diwydiant cerddoriaeth. Mae eu partneriaethau gyda digwyddiadau yn cynnwys SXSW, ESNS, Reeperbahn, M for Montreal, BreakOut West, Zandari Festa, ymhlith llawer o rai eraill. Mae Tŷ Cerdd yn cefnogi cyfleoedd i grewyr cerddoriaeth drwy lwybrau fel ISCM (Cymdeithas Ryngwladol Cerddoriaeth Gyfoes), yn ogystal ag arwain presenoldeb Cymru yn WOMEX, Classical:NEXT a jazzahead!, mewn partneriaeth â Chelfyddydau Rhyngwladol Cymru. 

Mae'r Memorandwm Cyd-ddealltwriaeth yma’n cydnabod ehangder ac amrywiaeth cerddoriaeth Cymru ac yn ceisio sicrhau bod artistiaid a gweithwyr proffesiynol y diwydiant o bob cefndir a genre yn cael mynediad at gyfleoedd rhyngwladol ystyrlon. 

Dywedodd Andy Jones, Cyfarwyddwr a Phennaeth Cerddoriaeth FOCUS Cymru: "Mae'r Memorandwm Cyd-ddealltwriaeth yma’n adlewyrchu ein hymrwymiad cyffredin i barhau i gefnogi a darparu cyfleoedd datblygu gyrfa arwyddocaol i’n hartistiaid a’n diwydiant sydd eisiau gweithio'n rhyngwladol. Trwy gydweithio yn yr ysbryd hwn, rydym yn gyffrous am yr hyn y bydd hyn yn ei olygu i weithwyr proffesiynol y diwydiant cerddoriaeth yng Nghymru, a all elwa o'n rhwydweithiau a'n profiad cyffredin wrth symud ymlaen." 

Dywedodd Deborah Keyser, Cyfarwyddwr Tŷ Cerdd: “Mae gweithio’n rhyngwladol yn bwysicach nag erioed i Dŷ Cerdd a'r crewyr cerddoriaeth yr ydym yn eu cefnogi. Mae'r bartneriaeth gyda FOCUS Wales wedi datblygu dros nifer o flynyddoedd gydag ymddiriedaeth a chydweithrediad wrth wraidd y berthynas ac mae'n neges bwerus i'n sector yng Nghymru ac i farchnadoedd tramor. Mae llawer o'r artistiaid rydyn ni'n eu cefnogi yn gweithio y tu allan i lwybrau amlwg – e.e. cyfansoddwyr clasurol cyfoes ac artistiaid arbrofol – ac mae'r cysylltiadau a’r platfform y gall #CerddoriaethGymreigDramor eu darparu yn amhrisiadwy iddyn nhw." 

Dau artist o Gymru ymhlith grŵp Rhwydwaith Byd-eang NAC Canada Cynhyrchwyr Benywaidd ac Anneuaidd; ymweliad wedi'i hwyluso gan Tŷ Cerdd

Er y bydd y ddau sefydliad yn parhau i gyflwyno eu rhaglenni a'u partneriaethau eu hunain, mae'r Memorandwm Cyd-ddealltwriaeth yn tanlinellu fframwaith cydlynu #CerddoriaethGymreigDramor – o lwybrau allforio pendant, i fentrau datblygu artistiaid ar y cyd, o weithgaredd cyfnewid mewnol, i ledaenu arferion gorau ynghylch teithio cynaliadwy. 

Trwy gydlynu ymdrechion dan bartneriaeth #CerddoriaethGymreigDramor, y nod yw darparu eglurder i bartneriaid rhyngwladol y diwydiant a chreu cysylltiadau rhyngwladol cryfach, mwy cynaliadwy. Mae'r ddau bartner wedi ymrwymo i weithio gyda sefydliadau eraill yng Nghymru i ddarparu'r cyfleoedd gorau i artistiaid.  

Cefnogi artistiaid ar bob cam 

Bydd y fenter yn canolbwyntio ar gefnogi artistiaid ar sawl lefel gyrfa - o dalent sy'n dod i'r amlwg sy'n chwilio am gyfleoedd allforio cyntaf, i artistiaid sefydledig sy'n adeiladu strategaethau rhyngwladol hirdymor. Mae'r Memorandwm Cyd-ddealltwriaeth hefyd yn rhoi pwyslais ar amrywiaeth, hygyrchedd a chynrychiolaeth ddiwylliannol. Mae’n sicrhau bod artistiaid Cymraeg eu hiaith ac artistiaid dwyieithog, yn ogystal â'r rhai o gymunedau sydd wedi'u tangynrychioli, yn cael eu cefnogi'n weithredol ar y llwyfan byd-eang. 

Mae'r Memorandwm Cyd-ddealltwriaeth yn arwydd o ymrwymiad parhaus i gryfhau ôl troed cerddoriaeth ryngwladol Cymru. Trwy gyfuno arbenigedd, rhwydweithiau ac uchelgais cyffredin mae FOCUS Wales a Thŷ Cerdd yn anelu at greu ecosystem allforio fwy cydgysylltiedig a gwydn ar gyfer cerddoriaeth Gymreig. 

Cefnogir gwaith FOCUS Wales a Thŷ Cerdd gan Gyngor Celfyddydau Cymru (gyda Chelfyddydau Rhyngwladol Cymru) a Chymru Greadigol. 

welshmusicabroad.com   

info@welshmusicabroad.com