Rhyddhawyd ar label Sionci 10 Rhagfyr

Côr Un Byd Oasis yn rhyddhau EP i nodi Diwrnod Hawliau Dynol

Côr Un Byd Oasis yn rhyddhau​
I’m not free until we’re all free

Ar ddydd Mawrth 10fed Rhagfyr – sef Diwrnod Hawliau Dynol 2024 – bydd Côr Un Byd Oasis o Gaerdydd yn rhyddhau record newydd ar label Sionci, sef label yr artistiaid eu hunain yn Tŷ Cerdd.

​

Mae Côr Un Byd Oasis yn croesawu pobl sydd wedi cael eu dadleoli o’u mamwlad ac wedi dod i Gymru. Nod y côr yw dysgu oddi wrth y rhai sy’n ymgysylltu â’r grŵp – gan rannu, tyfu a chreu gyda’n gilydd. Mae’r côr yn achubiaeth i lawer o bobl sy’n wynebu ailddechrau eu bywydau mewn gwlad newydd; yn aml mewn iaith sy’n gwbl newydd iddynt. Mae iaith cerddoriaeth yn mynd y tu hwnt i’r rhwystrau hyn, ac mae’r côr yn galluogi pobl i wneud ffrindiau newydd ac adeiladu cymuned gyda’i gilydd.

​

Yn ystod taith sydd wedi para bron i 10 mlynedd, mae’r Côr Un Byd wedi gallu creu cerddoriaeth sy’n unigryw ac yn gyffrous ac sydd hefyd yn parchu diwylliant pawb sy’n ychwanegu ati. Rhoddir llais i ffoaduriaid yn eu cymuned newydd, gan hybu mwy o empathi a dealltwriaeth o’r materion y maent yn eu hwynebu – gan ddod yn fodelau rôl i eraill.

​

Wrth gydweithio â Tŷ Cerdd / Canolfan Cerddoriaeth Cymru i ryddhau’r EP newydd hwn i nodi Diwrnod Hawliau Dynol 2024, caiff y lleisiau hyn eu clywed ymhellach, trwy’r label proffesiynol, Sionci, sef label yr artistiaid eu hunain yn Tŷ Cerdd, a thrwy hynny yn rhannu model pwerus ar gyfer undod mewn cyfnod mor rhanedig. Mae’r pedwar trac ar yr EP yn adleisio thema Hawliau Dynol y Byd 2024, sef: Cydraddoldeb – lleihau anghydraddoldebau a hyrwyddo hawliau dynol. Maent yn llawenhau wrth ystyried a chryfhau’r cysyniad o Gymru fel Cenedl Noddfa.

​

Dywedodd Christianah Ugbaja, aelod o Gôr Un Byd Oasis: “Mae’n gyfle gwych i ni gydweithio â Tŷ Cerdd. Bydd cael ein caneuon wedi’u recordio a’u lansio ar eu platfform yn rhoi mwy o amlygrwydd a sylw i’n côr ni – cyfle i rannu ein caneuon gyda’r gymuned ehangach.”