CoDI Côr CYM | tycerdd

CoDI Côr
llwybr sgiliau corawl

Yn galw ar grewyr cerddoriaeth o unrhyw genre i gael cyfle i ddatblygu’n greadigol drwy gyfansoddi ar gyfer côr cymunedol

Mae’r llwybr hwn yn cynnig cyfle i 5 o grewyr cerddoriaeth o Gymru ddatblygu sgiliau wrth gyfansoddi gwaith sy’n newydd ac yn unigryw ar gyfer côr cymunedol, gan wneud hynny gyda’r mentor Nathan James Dearden a Côr ABC.

Mae corau cymunedol yn allweddol i gerddoriaeth yng Nghymru, ac yn hollbwysig i ddull democrataidd ein cenedl o greu cerddoriaeth. Mae’r rhan fwyaf o gorau cymunedol yn cynnwys aelodau o wahanol alluoedd a chefndiroedd.

Bydd y mentor Nathan James Dearden (sy’n gyfansoddwr/addysgwr) a Côr ABC o Aberystwyth yn gweithio gyda’r artistiaid a ddewisir i ddatblygu’r darnau newydd.

Mae Côr ABC yn gweithio’n bennaf drwy gyfrwng y Gymraeg, a bydd o leiaf ddau o’r cyfansoddwyr a ddewisir yn ymrwymo i ysgrifennu gwaith yn y Gymraeg.

Mae croeso i artistiaid sy’n defnyddio dulliau arbrofol/di-nodiant wneud cais, yn ogystal â’r rhai sy’n defnyddio nodiant cerddorol safonol.

Os credwch fod gennych chi rywbeth diddorol i’w gyfrannu at gôr cymunedol – gwnewch gais!

YNGHYLCH Y LLWBR

Byddwn yn dechrau pethau mewn bŵt-camp deuddydd yn hyfforddi sgiliau corawl [dydd Llun 3ydd a dydd Mawrth 4ydd Tachwedd] yn ein Stiwdio yn Nhŷ Cerdd (yng Nghanolfan Mileniwm Cymru, Caerdydd). Bydd y rhain yn sesiynau bywiog, llawn gwybodaeth, yn edrych ar wahanol ddulliau o ysgrifennu ar gyfer corau. Byddwn hefyd yn ymweld â Chôr Cenedlaethol Cymru’r BBC wrth iddyn nhw ymarfer gyda’r nos ar y 4ydd Tachwedd, i gael blas o waith grŵp mawr sydd â chlyweliadau i ymuno ag ef.

Yna bydd y crewyr cerddoriaeth yn mynd ati’n annibynnol i ddatblygu eu darnau newydd, gyda chefnogaeth un-i-un gan Nathan James Dearden ac aelodau tîm Tŷ Cerdd.

Ar ddechrau 2026, bydd dau weithdy diwrnod llawn yn Aberystwyth gyda Chôr ABC – byddwn yn darparu llety a threuliau teithio i’r rheiny sydd eu hangen. A byddwn hefyd yn cynnal sesiwn olaf i rannu’r holl waith. Dyma’r dyddiadau:

Dydd Sadwrn 28 Chwefror - gweithdy #1
Dydd Sadwrn 28 Mawrth - gweithdy #2
Dydd Sadwrn 9 Mai - gweithdy olaf / digwyddiad rhannu

Bydd pob cyfansoddwr sy’n cymryd rhan yn cael tâl o £1,000 (yn ogystal â threuliau teithio o fewn Cymru, a llety lle bo angen).

Diweddariad: I ddysgu mwy am y cyfle hwn, gallwch gwylio’n sesiwn wybodaeth ar-lein o ddydd Llun 14 Gorffennaf FAN HYN.

PAM NI?

Gan mai ni yw Canolfan Gerdd Cymru, mae Tŷ Cerdd wedi ymrwymo i gefnogi a datblygu cerddoriaeth Gymreig newydd o bob math – wedi’i hatgyfnerthu gan ein mantra, “Os ydych chi’n gwneud cerddoriaeth yng Nghymru, mae’n gerddoriaeth Gymreig!”

Nathan James Dearden– cyfansoddwr/addysgwr o Gymru (darlithydd mewn Cyfansoddi, y Royal Holloway) ac mae ganddo gryn brofiad o ysgrifennu ar gyfer corau o wahanol alluoedd a dulliau.

Côr ABC – côr cymysg, cymunedol wedi’i leoli yn Aberystwyth ac sy’n gweithio’n bennaf trwy gyfrwng y Gymraeg, dan yr arweinydd Louise Amery.

PWY SY'N GYMYWS

Rydych chi’n grëwr cerddoriaeth o Gymru. Os ydych chi’n creu cerddoriaeth wreiddiol ac wedi bod yn byw yng Nghymru ers o leiaf blwyddyn (neu os cawsoch eich geni yng Nghymru ond yn byw yn rhywle arall), rydych chi’n gymwys. Bydd bwrsariaethau treuliau ar gael i artistiaid deithio o fewn Cymru. Sylwer: ni fyddwn yn talu treuliau teithio y tu allan i Gymru.

Rydym yn croesawu ceisiadau gan grewyr cerddoriaeth nad yw eu gwaith yn cynnwys nodiant cerddoriaeth safonol (e.e. artistiaid sy’n gweithio gyda gweithfan sain ddigidol) yn ogystal â cheisiadau gan artistiaid sy’n defnyddio nodiant.

Rhaid i chi fod ar gael i ymrwymo i’r dyddiadau sydd wedi’u trefnu ar gyfer y llwybr.

Os oes gennych ddiddordeb, ond mae gennych ambell gwestiwn…

…gallwn gael sgwrs â chi dros y ffôn neu ar Zoom. Anfonwch e-bost neu ffoniwch i drefnu sgwrs.

SUT I YMGEISIO

Lanlwythwch y wybodaeth ganlynol i’n PORTH ar-lein

1. Manylion personol: eich enw, cyfeiriad e-bost, rhif ffôn symudol, cyfeiriad, ynghyd â chadarnhad eich bod dros 18 oed.

2. Dywedwch wrthym am eich gwaith: Rhowch wybod beth rydych chi wrth eich bodd yn ei wneud fel artist/crëwr cerddoriaeth a beth rydych chi wedi bod fwyaf balch ohono. Fel rhan o’ch ateb, dywedwch wrthym a ydych chi’n defnyddio nodiant cerddorol ai peidio, neu sut rydych chi’n creu eich gwaith. (Dim mwy na 200 gair)

3. Pam fyddech chi’n hoffi bod yn rhan o’r llwybr hwn?

Dywedwch wrthym beth hoffech ei ddysgu drwy’r llwybr hwn, a sut yr ydych yn gobeithio y gallai effeithio ar eich gwaith.
Beth ydych chi’n teimlo sydd gennych i’w gyfrannu at gôr cymunedol?
Fel rhan o’ch ateb, dywedwch wrthym a hoffech gael eich ystyried i osod gwaith yn y Gymraeg fel rhan o’r llwybr, a pham. (dim mwy na 400 gair)

4. Enghreifftiau o’ch gwaith: plîs danfonwch ddolenni i ddau ddarn o'ch cerddoriaeth (sylwer: anfonwch ddolenni yn hytrach na ffeiliau sain neu fideo; os oes angen help arnoch i greu dolenni, cysylltwch ag ymholiadau@tycerdd.org.)

5. A oes gennych chi unrhyw anghenion mynediad? Dywedwch wrthym os oes angen unrhyw gefnogaeth arnoch i’ch galluogi i gymryd rhan yn y llwybr. Rydym hefyd yn eich gwahodd i rannu a thrafod eich dogfen hygyrchedd a’ch gofynion mynediad gyda ni ar unrhyw adeg yn ystod y prosiect. Ni fydd y wybodaeth hon yn cael ei rhannu gyda’r panel oni bai eich bod yn rhoi eich caniatâd i hynny. Os oes gennych unrhyw gwestiynau ynghylch mynediad neu ynghylch rhannu’r wybodaeth hon, anfonwch e-bost at ein Rheolwr Datblygu Artistiaid, Freya Dooley (freya.dooley@tycerdd.org).

Noder: rydym yn croesawu ceisiadau drwy fideo a sain hefyd. Recordiwch eich atebion i gwestiynau 2 a 3 uchod (hyd at 4 munud o hyd), a lanlwythwch ddolen i’ch recordiad, gan roi’r wybodaeth y gofynnwyd amdani yng nghwestiynau 1, 4 a 5 ar y ffurflen i’w lanlwytho. Os oes angen help arnoch i greu dolen i’ch fideo, cysylltwch â Freya Dooley neu ymholiadau@tycerdd.org i gael cymorth.

AMSERLEN A'R BROSES

Dyddiad cau ar gyfer ceisiadau: 12:00 ganol dydd, dydd Mercher 6 Awst
Y panel fydd Nathan Dearden, Louise Amery (arweinydd Côr ABC) a Deborah Keyser a Freya Dooley (Tŷ Cerdd).
Byddwn yn rhoi gwybod y canlyniad i chi erbyn dydd Gwener 22 Awst.

Os oes gennych ddiddordeb, ond mae gennych ambell gwestiwn…

…gallwn gael sgwrs â chi dros y ffôn neu ar Zoom. Anfonwch e-bost at Freya Dooley neu ymholiadau@tycerdd.org er mwyn i ni drefnu galwad ffôn. Rydym am gael gwared ar gymaint o rwystrau ag y gallwn – felly os oes unrhyw beth yr hoffech siarad â ni amdano, rhowch wybod i ni a byddwn yn ceisio helpu i ddod o hyd i ateb.

▶ Galwad Llwybr i'r Gerddorfa

Tŷ Cerdd is a member of the PRS Foundation Talent Development Network

CoDI Côr llwybr sgiliau corawl