Atamanaa (sef ‘gobeithiaf’ yn Arabeg) yw’r ail sengl a theitl y trac oddi ar EP sydd ar fin ei chyhoeddi gan Panedeni (allan 19 Mehefin 2026 ar Sionci, sef label Tŷ Cerdd dan arweiniad artistiaid) ac mae’n dilyn eu sengl gyntaf, Tafod, cân Gymraeg, yn gynharach eleni. Mae enw’r band, sef ‘Panedeni’, yn cyfuno’r gair Cymraeg ‘paned’ â the Adeni o Yemen, gan symboleiddio diwylliant cyffredin Arabaidd a Chymreig a dod â phobl ynghyd.

​

Ysgrifennwyd Atamanaa ar y cyd gan Yasmine Latkowski (Panedeni) ac Ayoub Boukhalfa (Côr Un Byd Cymru), gan dynnu ar brofiadau byw o’u treftadaeth yn y Dwyrain Canol (Yemeni a Moroco) ac o fod yn artistiaid sy’n byw yng Nghymru. Gan fod â lleisiau Arabeg swynol, ynghyd â’r offerynnau oud, ffliwt, bas dwbl, ffidil, piano ac offerynnau taro Arabaidd, mae Atamanaa yn codi o hiraeth dwfn am heddwch, ac mae’n neges o gariad a gobaith o Gymru i’r Dwyrain Canol.

​

Bydd y fideo ar gyfer Atamanaa, a gefnogwyd gan Gronfa Fideos PYST x S4C, hefyd yn cael ei rhyddhau ar 1 Mai 2026. Ffilmiwyd y fideo a’i chyfarwyddo gan Rob Corcoran (73 degree films) yn y Gogledd ger Llangollen gydag Ayoub Boukhalfa, ac mae Yasmine yn disgrifio’r fideo fel “neges o gariad o Gymru i’r Dwyrain Canol”.

​

Mae’r EP Atamanaa sydd ar fin ei chyhoeddi yn ehangu sain draws-ddiwylliannol Panedeni, gan gynnwys offeryniaeth werin Arabaidd a Chymreig. Mae wedi’i chanu mewn pedair iaith, sef Cymraeg, Saesneg, Arabeg a Bosnieg, ac mae’n arddangos cymysgedd amlddiwylliannol o gerddoriaeth wreiddiol a cherddoriaeth draddodiadol wedi’i hailddychmygu. Mae gwaith Panedeni wedi’i wreiddio mewn cynhwysiant, gan ddathlu amrywiaeth a chreu gwaith sy’n dwyn ynghyd dreftadaethau cerddorol unigryw yng Nghymru.

​

Meddai Yasmine Latkowski: “Mae Atamanaa yn bersonol iawn i mi ac Ayoub. Ers cyfansoddi’r gân ar-lein heb erioed gwrdd â’n gilydd, rydyn ni bellach wedi’i dysgu i gorau ledled Cymru ac yn edrych ymlaen at ei pherfformio yng Ngŵyl Ymylol Llangollen ar 12 Medi.”

​

Bydd Atamanaa ar gael ar bob prif blatfform ffrydio o 1 Mai 2026. Bydd Panedeni yn perfformio yn FOCUS Wales ddydd Gwener 8 Mai, 7pm yn HWB (rhagor o wybodaeth yma: FOCUS Wales 2026 Panedeni | FOCUS Wales 2026).