Jordan Price Williams yn ymuno â thîm Tŷ Cerdd

Rydyn ni wrth ein boddau i gyhoeddi penodiad Jordan Price Williams fel Rheolwr Datblygu Cerddoriaeth Draddodiadol newydd Tŷ Cerdd. Mae’r rôl newydd hon wedi’i hariannu gan Gyngor Celfyddydau Cymru, yn dilyn eu hadolygiad diweddar i mewn i Gerddoriaeth Draddodiadol yng Nghymru. Bydd Jordan yn gweithio gyda’r tîm staff yn Tŷ Cerdd, ac mewn partneriaeth â ChCC, i gefnogi artistiaid a chymunedau sy’n ymwneud â Cherddoriaeth Draddodiadol o bob math. 

Dywedodd Jordan: 

“Mae hyn yn teimlo fel trobwynt gwirioneddol i gerddoriaeth draddodiadol yng Nghymru, ac rwy’n teimlo’n hynod o lwcus i chwarae rhan yn y gwaith datblygu sydd yn daer ei angen ar ein cymuned. Mae’n gyfle cyffrous, ac mae gweithio ochr yn ochr â thîm gwych Tŷ Cerdd dim ond yn gwella’r cyfle hwn. Rydyn ni eisoes wedi cymryd y camau cyntaf tuag at greu cyfleoedd ystyrlon i helpu artistiaid a cherddorion bob dydd i gysylltu, cydweithio a ffynnu.” 

Mae Jordan yn gerddor traddodiadol arobryn ac yn un o aelodau sylfaenol y triawd gwerin VRï, gyda phwy mae wedi teithio’n rhyngwladol ac wedi rhyddhau dau albwm sydd wedi derbyn canmoliaeth feirniadol. Yn adnabyddus am ei rhuglder dwfn yn y traddodiad Cymreig a’i waith creadigol traws-genre, mae Jordan yn perfformio mewn gwyliau mawr, yn cyfansoddi repertoire newydd ac yn arwain prosiectau gwerin cynhwysol, megis penwythnos ffidil Ffidil Fawr a Bagad Grwndi, sef cerddorfa ffidil gymunedol gyntaf Cymru.